1390. Juli 23. Czarnowanz

In Nomine Domini Amen. Sub anno Nativitatis eiusdem Millesimo Trecentesimo Nonagesimo Indicione xiiia die xxiii. mensis Julii, hora vesperorum vel quasi, in Camenata habitacionis Monasterii Czarnowans Religiose ac devote virginis Elysabeth dicte Laskowska, Pontificatus Sanctissimi in Cristo patris et domini nostri domini Bonifatii digna dei providencia pape noni moderni anno primo, In mei Notarii publici et testium infrascriptorum presencia Religiosus vir frater Nicolaus de Gane plebanus in Opatow provisor ac gubernator dicti Monasterii Czarnowans, personaliter constitutus, Venerabilibus ac Religiosis virginibus Phylomene priorisse, Dorothee subpriorisse, Girdrude circatrici, Clare cellerarie, Boguscze custrici Anne Zegrodonis, Bronislawe Jagodzancze succentrici, Ofcze dicte Kanthowne, Katherine dicte Marschowna, Elisabeth Sbroskonis, Helene Jagodzanka, Elisabeth de Lassowicz predicte, Agneti Swirczowna, Margarethe Stephkonis, Agneti Vincencii, Elisabeth Kanclzerzowka, Barbare Beczonis, Anne Korzeczwanka, Offcze Beroldi de Posnowicz Aliisque omnibus et singulis virginibus tocius conventus conventualiter convocatis de Quinquaginta tribus marcis tribus fertonibus et uno scoto grossorum per ipsum dominum Nicolaum in Bonis dicti Monasterii perceptis ac per ipsum de mandato et voluntate pariter et consensu ad necessitatem virginum predictarum et Monasterii a die octava beati Martini Episcopi et confessoris de Anno domini Millesimo ccc° octuagesimo nono usque ad diem xxiij mensis Julii Anni nonagesimi prescriptum expositis realiter et distributis Laudabilem iustam sufficientem et condignam fecit et posuit racionem. Ultra que percepta memorate virgines domino Nicolao prefato in Septem marcis et uno scoto grossorum remanserunt in solvendo, veluti in ipsarum virginum et domini Nicolai prefati Registris clausulatim continetur. Qua quidem racione facta prefate virgines eandem racionem approbantes atque ratam et gratam habentes, ipsum dominum Nicolaum memoratum de pecuniis perceptis et distributis prescriptis ab inpeticione et arrestacione ipsarum tam Judiciali quam extra absolverunt atque liberum solutum et quitum pronuneciarunt, de ulterius ipsas pecunias et racionem eandem ab ipso non poscendo. Super quibus omnibus et singulis premissis prefatus dominus Nicolaus a me Notario publico infrascripto fieri sibi peciit presens hoc publicum Instrumentum. Acta sunt hec Anno Indicione die Mensis hora loco et pont. quibus supra, presentibus Discretis viris dominis Johanne de Cosla, Nicolao Pauli de Nitkelyn, Cappellanis, Paulo Molendinatore de Strelin Organista Wenceslao Swentkonis de Bryniczia ac Martino dicto Lassek de Cosla, dicti Monasterii familiaribus aliisque quampluribus testibus ad premissa vocatis et rogatis fidedignis.
Signum notarii.
Et ego Petrus Schorgast olim Jaschconis clericus Wrat. dyoc. publicus Imperiali auctoritate notarius, premissis omnibus et singulis dum sic fierent et agerentur, una cum testibus prenominatis presens fui eaque sic fieri vidi et audivi, aliisque negociis arduis prepeditus per alium Notarium publicum scribi feci et in hanc publicam formam redegi, me manu propria subscribendo, signoque et nomine meis solitis et consuetis consignavi, rogatus et requisitus in fidem et testimonium omnium premissorum.

Aus dem Archiv von S. Vincenz.

Codex Diplomaticus Silesiae, hrsg vom Vereine für Geschichte und Alterthum Schlesiens, Bd 1, Urkunden des Klosters Czarnowanz. Hrsg von dr W. Wattenbach, Breslau 1857.